തെന്നിന്ത്യയുടെ ഹൃദയഭാഗത്ത് ഉദയം ചെയ്യുകയും ലോകത്തിലെ വിവിധ ദേശങ്ങളിലേക്ക് കാലഭേദങ്ങൾ ബാധിക്കാതെ വൈജ്ഞാനിക കിരണങ്ങൾ പ്രസരണം ചെയ്ത് സത്യവിശ്വാസത്തിന്റെ സാംസ്കാരിക ചൈതന്യം തനിമ ചോരാതെ പ്രകാശിപ്പിക്കുകയും ചെയ്യുന്ന അനുഗ്രഹീത കലാലയം ആണ് ജാമിഅ അൽ ബാഖിയാത്ത് സ്വാലിഹാത്ത് വേലൂർ , എഡി 19 ആം നൂറ്റാണ്ടിന്റെ ഉത്തരാർദ്ധത്തിൽ സമാരംഭം കുറിക്കപ്പെട്ട് ഒന്നര നൂറ്റാണ്ട് കാലം പിന്നിടുമ്പോൾ വിജ്ഞാന സേവന രംഗത്ത് ഇന്നും സജീവമാണ് ഈ മഹദ് സ്ഥാപനം, സാമ്പ്രദായിക ഘടനകളിൽ നിന്ന് വ്യത്യസ്തമായി നവീനമായ ശൈലിയിൽ വ്യവസ്ഥാപിതമായ ഒരു കരിക്കുലത്തിനെ കേന്ദ്രീകരിച്ച് ആവിഷ്കൃതമായ ഇന്ത്യയിലെ തന്നെ പ്രഥമ മതവിദ്യാബോധന സംവിധാനം ആയതിനാൽ “ഉമ്മുൽ മദാരിസ്” എന്ന പേരിലാണ് ഈ സ്ഥാപനം അറിയപ്പെടുന്നത്, പ്രവർത്തന ഭരിതവും കർമ്മനിരതവുമായ ഒന്നര ശതാബ്ദങ്ങൾ വിദ്യാന്വേഷണ തല്പരരായി പ്രവഹിക്കുന്ന പരസഹസ്രങ്ങൾക്ക് മാർഗ്ഗദർശനമേകി ദീപ ഗോപുരമായി ഉയർന്നു നിൽക്കുകയാണ് ഈ മഹനീയ ജ്ഞാന കേന്ദ്രം. തലമുറകളിലേക്ക് ജ്ഞാന സുഗന്ധം പരിലസിപ്പിച്ച ബാഖിയാത്തിന്റെ ജീവവായുവും ആത്മ ചൈതന്യവും അതിന്റെ ബീജാവാപകനായ അഅലാ ഹസ്രത്ത് ശംസുൽ ഉലമ ശൈഖുൽ മഷാഇഖ് അബ്ദുൽ വഹാബ് ഹസ്രത്ത് (ന:മ) ആണ് . പ്രഖ്യാത വിജ്ഞന്മാരും പ്രകാശദീപങ്ങളുമായിരുന്നു മഹാനവർകളുടെ പൂർവ്വസൂരികൾ. ശരീഅത്തിന്റെയും ത്വരീഖത്തിന്റെയും വിജ്ഞാനങ്ങൾ നേടിയ അശ്ശൈഖ് മൗലവി ആത്തൂർ അബ്ദുൽ ഖാദർ സാഹിബിന്റെയും(ന:മ) സയ്യിദ് റുഖ്നുദീൻ (പ്രസിദ്ധ സൂഫിവര്യനും വലിയുമായ ഖുതുബേ വേലൂർ(ന:മ)ന്റെ പിതാവ്) ന്റെ ഖലീഫയായിരുന്ന മുഹമ്മദ് അമീൻ സാഹിബിന്റെ പുത്രി ഫാത്തിമ എന്നവരുടെയും മകനായി ഹിജ്റാബ്ദം 1247 ജുമാദുൽ ഊല ഒന്നിനാണ് മഹാനവർകളുടെ ജനനം. മൗലാനാ ഹക്കീം സൈനുൽ ആബിദീൻ ഹസ്രത്ത് (റ) , മൗലാനാ ഗുലാം ഖാദിർ മദ്രാസി ഹസ്രത്ത് (റ), മൗലാനാ റഹ്മത്തുല്ലാഹിൽ കീറാനവി (റ),മൗലാനാ സയ്യിദ് ഹുസൈൻ ഹസ്രത്ത് പെഷാവരി (റ), അശൈഖ് അഹമ്മദ് സൈനി ദഹലാൻ (റ),ഖുതുബേ വേലൂർ ശാഹ് അബ്ദുല്ലത്തീഫ് ഹസ്രത്ത് (റ) തുടങ്ങി പ്രഗൽഭരായ മഹാഗുരുക്കന്മാരിൽ നിന്ന് ജ്ഞാന പാനം ചെയ്ത മഹാനവർകൾ സുദീർഘമായ അനവധി യാത്രകൾ ഇതിനായി നടത്തിയിരുന്നു , ജന്മ ദേശത്തിന് പുറമേ ഇന്ത്യയുടെ വിവിധ പ്രദേശങ്ങളിലും പരിശുദ്ധ ഹറമിലും അവിടുന്ന് വിദ്യാർത്ഥി ജീവിതം നയിച്ചു , നാട്ടിലേക്ക് തിരിച്ചെത്തിയ ഹസ്രത്ത് സാധാരണ ഏതൊരു പണ്ഡിതനെയും പോലെ ദീനീ പ്രചരണവും ഉൽബോധനങ്ങളുമായി മുന്നോട്ടുപോകവേ നിരവധി പ്രചോദനങ്ങളുടെ ഫലമായിട്ടാണ്ദീനീ സ്ഥാപനം എന്ന സദുദ്യമത്തിന് മുന്നിട്ടിറങ്ങുന്നത്, ആത്മീയാചാരന്മാർ ഹസ്രത്തിനോടും മാതാപിതാക്കളോടും ചെയ്ത ആശീർവാദങ്ങളും പ്രവചനങ്ങളും ഹസ്രത്ത് അവർകൾ ദർശിച്ച സ്വപ്നങ്ങൾ, ഗുരു മഹത്തുക്കളുടെ നിർദ്ദേശങ്ങൾ, ബിദ്അത്തിലും അനാചാരങ്ങളിലും ശരി തെറ്റുകൾ വിവച്ചേതിച്ചറിയാൻ കഴിയാതെ മുഴുകി പോയിരുന്ന ജന ങ്ങളുടെ ജീവിത സാഹചര്യത്തെക്കുറിച്ചുള്ള ഉത്കണ്ഠ എന്നിവയൊക്കെ സ്ഥാപന സംസ്ഥാപ നത്തിന് ഹേതുകമായി തീർന്നിട്ടുണ്ട് . ഹിജറാബ്ദം 1273 [ എഡി 1856 ] ലായിരുന്നു പൂർവ്വകാല അടരുകൾ പരതുമ്പോൾ ചരിത്രത്തിലെ വഴിത്തിരിവെന്ന് നിസ്സംശയം അഭിമാനിക്കാവുന്ന ആ നവയുഗ പിറവി. അഅലാ ഹസ്രത്തിന്റെ വീടിന്റെ വിശാല വരാന്തയിലാണ് സ്വപ്ന ദർശനം ഉണ്ടായ സ്വർഗ്ഗീയ ആരാമത്തിന് സമാരംഭം ഉണ്ടായത്, ഹിജ്രി 1286 ൽ മസ്ജിദിന് സമീപത്തേക്ക് ആ മതപാഠശാല പുനർ വിന്യസിക്കപ്പെട്ടു, വിദ്യാർത്ഥികളുടെ എണ്ണപ്പെരുപ്പവും സൗകര്യങ്ങളുടെ പര്യാപ്തി ഇല്ലായ്മയും മൂലം വിപുലമായ ഒരു സംവിധാനത്തിന്റെ ആവശ്യകതക്കുള്ള സമ്മർദ്ദം ഏറി വന്നു. അതിന്റെ ഫലമായി ആറു വർഷങ്ങൾക്ക് ശേഷം ഹിജ്രി 1292 ൽ മസ്ജിദിന് സമീപം ചതുരാകൃതിയിൽ നിർമ്മിതമായ മനോഹര സൗദത്തിലേക്ക് ജാമിയയുടെ പ്രവർത്തനങ്ങൾ സംവിധാനിക്കപ്പെട്ടു . ബാഖിയാത്തിന്റെ പ്രാരംഭം മുതൽ 1919 ജനുവരി 25 (ഹിജ്റാബ്ദം 1337 റബീഉൽ 22) ന് ഇഹലോകവാസം വെടിയുന്നതുവരെയുള്ള സുദീർഘമായ 62 വർഷങ്ങൾ മഹാനുഭാവന്റെ അനുഗ്രഹീത നേതൃത്വത്തിലാണ് സ്ഥാപനം മുന്നോട്ട് ചരിച്ചത്. ബാഖിയാത്തിന്റെ പ്രവർത്തനങ്ങ ൾക്ക് ദിശാബോധം നൽകുന്നതിൽ ഈ നേതൃത്വം സുപ്രധാനമായ പങ്കുവഹിച്ചിട്ടുണ്ട്. പിൽ കാലങ്ങളിൽ ഹസ്രത്ത് അവർകളുടെ ശിഷ്യന്മാരും അവരുടെ പിൻഗാമികളുമായ പ്രഗത്‌മതികളും മഹാജ്ഞാനികളും ജാമിയയുടെ അധ്യക്ഷ സ്ഥാനം അലങ്കരിക്കുകയും സ്തുത്യർഹവും മാതൃകാപരവും ആയി ഇന്നും അത് തുടർന്ന് വരുകയും ചെയ്യുന്നു.